一道亮麗的男同事涼鞋風景線

題目有一點大陸媒體味，無他，因為味之鬼「乙」來自祖國。

乙由一間行內中型機構毛遂自薦來這間行內號稱最大型機構（本機構由金正日開設，理論上一定係至大），聲稱要找尋「發展空間」。

佢之前係中型機構都叫主管一名，現家黎到北韓呢個大國，連職銜都冇。

可能因為有口音關係，乙好像不願和同事交流，莽莽撞撞，開始時得罪晒全組人。

因為冇位佢坐（黎左四個月都冇，金正日食屎啦），佢會忽然坐左係閣下既位上，令你非常不好意思。（開頭唔知佢開邊瓣，係有點不尷不尬）

佢中意同年紀有番咁上下既同事交流（佢同味之鬼甲好投契，果然臭味相投），對我地幾個散仔不瞅不睬。對女同事，都冇乜點理。

結果，佢個花名叫做「禮貌」，全組一直沿用到而家。（用到我好驚真係稱呼左佢做，禮貌）

呀禮貌，你好似用左我支筆．．．．

呀禮貌呀，你隻腳踩住我隻腳成個字喇，（佢聽唔到）sor！禮．．．唔係，乜生，你隻腳（提高八度）．．．．

禮貌當時最令人聞風喪膽既，係佢用完任何一位同事既檯，張檯就會好似俾颶風卡特里娜吹過一樣，而佢，係唔會執既。

佢平時行過整瀉整跌你D野，佢會繼續行。

仲有，當電視做新聞響起國歌時，佢會一路做野，一路好有beat咁踩住涼鞋泵地。由於佢做野個樣太專注既關係，佢無意識起勢泵個樣好駭人。

禮貌，除左好冇禮貌之外，佢D衫褲鞋（佢唔著襪），係唔換既。

到味之鬼甲走左，同事們忽然發覺，原來禮貌都可以勝任味之鬼一職。

因為佢成身都有一陣味，口一陣味，身一陣味，但佢當然意識唔到。

味之最高境界，唔係味隨人至，而係你行過佢身邊，彷如進入一道「味場」（一如磁場、氣場）。

禮貌冇禮貌，我地開始都唔當一回事，因為佢個人其實冇乜野，只係有點社交貧乏症，應該長年都唔會好，但我衷心希望（雖然可能性近乎零）佢唔好再有味。

因為，佢今個月坐我隔離。

（二）