做高層真係好

日前，「準時食飯小組」三人之中，匿名放假，只有本人及另一同事子華準時用膳，餘下笑話老頭及少年馬神，在樓上辛勤地搏鬥。

先介紹一下。子華和少年馬神均是香肛大學畢業生。子華在行內打滾多年，年近三十，事業完全無起色，做極散仔一名，係個種自己知自己衰但發奮唔起既類型，覺得可以係北韓勞動，係執到好籌，由於佢講野幾好笑，匿名成日叫佢轉行演藝界，搞棟篤笑，這裏暫稱子華。至於少年馬神，典型文科學生一名，咪書型，乖學生型，淆底型，容易受傷覺得好hurt型，笑話唔好笑型，非交際型，一畢業便到北韓勞動，從無出走意欲，至今已四年，「因為太悶」，染上賭馬惡習，和笑話老頭情同父子。

由於佳節當前，返工人數嚴重不足，我和子華用膳完畢，樓上本部組位置空無一人，一出電梯，極目只見肋手判官一人目露兇光，由好遠處好似動感死光咁射過黎。

肋手判官，最原本的花名為小新，因為名字有一「新」字。後來小新升做真正的高層，為談話小心起見，改為蠟筆，用了好一陣子，近幾個月改為肋骨，越見隱蔽，不久子華轉稱肋骨為辣手判官，很快便變成「肋手判官」，簡稱肋氏。

一個人的花名可以如此嬗遞，可見佢本身係話題人士。

子華一埋位，肋氏便喝道：「你D野做完未？」肋氏不嬲中意大大聲叫人埋黎俾佢怒屌。但佢一向唔屌本組，予人愛護其直轄部組的感覺，所以肋氏此一呼喝，令人甚為愕然。

子華只做左個頭，但當然答：「就黎做晒！」

肋氏再喝道：「D野幾時派俾你架！？」

子華開始低聲道：「．．．六點幾。」

「而家幾點呀！」

時鐘顯示八點半有多。

「六點幾派俾你D野仲未做晒，可以炒得囉喎。」

肋氏既口頭禪係「炒Q你」，我地都聽到麻木晒，但從未見佢炒過一個，佢最中意懶型咁撻你一句：「炒Q你丫拿！」

不久，笑話老頭、少年馬神、禮貌、主任味之鬼丙、味之鬼丙的副主任「好朋友」麥兜娜陸續回來，肋氏召集這批咁o岩唔係放假既可憐蟲聽佢訓話。

肋氏鳩o翕一輪，簡撮如下：

1)唔好Dum波鐘，要快手做完手頭工作，仲恐嚇說「你識計我都識計」、「我會係評核如實咁寫」。 但咁只證明返遲半個鐘既指令係多舊魚，而且，唔夠人返工就自己執下張假表，淨係識執散仔既假表，部組內中層差唔全部放晒假，又唔見佢執下，剩下禮貌呢隻勤勞命賤打不死既曱甴，慢工出細貨地慢慢改功課。everything happens for a reason，高層最叻乜都話係下面有問題，正一痔瘡生上腦。

2)重新分配食飯時間。底下原因係，佢六點開會開到七點，而我地有時做到一半落去食飯，食一個鐘，結果八點多上到黎，做完一份有時要九點幾（看功課份量而定），由於當日返工太少人，所以出現一份功課都冇的情況。佢要求全體六點食，七點上黎開工，即係以前分批食飯既指令係多舊魚。但味之鬼丙和麥兜娜要分開時間食，因為要有個人睇場。而我地終於知道，雖然北韓訂明食飯時間係一個鐘，但全層冇人食足一個鐘，係我地錯，勞動人民果真夠敬業。

翌日，肋氏仲夠膽死叫組內另一中層金兵mark低大家交功課既時間，金兵後來報告話睬佢都傻，佢自己都做到成隻積咁。當晚，冇人理會肋氏係六點食飯既指示，大家都做完一份功課先落去，味之鬼丙和麥兜娜飯都冇食，係辦公桌啃麵包，肋氏呢，一如以往落canteen同人鄰組談笑風生。收十二點既少年馬神放工後匯報話，肋氏當日未完成所有工作，便向味之鬼丙二人拋低一句「我好累，你搞埋D野佢」，然後鬆人。

奇怪，可能有D上司覺得士氣唔重要，開口埋口「炒Q你」，但既然金正日成日都出埋D恐嚇聖諭，公司文化係咁，又唔駛大驚小怪。

做高層，十幾皮一個月，得閒請大家食下蛋糕，唔順意就搵D茂利黎屌，又可以做高層色魔，多麼的令人嚮往啊！